النجمة ديمة الجندي تعاتب شركات الإنتاج
وجهت الفنانة السورية ديمة الجندي رسالة شديدة اللهجة إلى بعض شركات الإنتاج عبر السوشال ميديا، أثارت فيها الجدل بين متابعيها، وجاء فيها: “إلى شركات الإنتاج والمنتجين ومدراء إدارة الانتاج ومدراء الانتاج والمخرجيييين، إذا ما بتعرفونا ولا بتعرفوا شو مشتغلين ولا شو قيمتنا الفنية! فيكون على الاقل تعملوا غوغل على اسمائنا وتتعرفوا علينا من اول وجديد و#رصاص قرفتونا هذه المهنة“.
وعلى هامش مشاركتها في مهرجان الفجيرة للفنون تحدثت ديمة عن سبب هذه الرسالة شديدة اللهجة:” في منطق غلط بالتعامل بالدراما مؤخراً، لا انا ولا غيري اصلاً راضيين عنه، وفي فترة من الفترات كنا مقررين انه ما بدنا نحكي او خلينا نعطي الامور حدها الاخير لأنه بالأخير لا يصح الا الصحيح، ولكن يبدو انه الصحيح ما راح يجي الا اذا صار في ثورة على الدراما العربية.”
ونفت ديمة أن يكون هناك أسباب شخصية وراء الرسالة وإنما بسبب شعور عام بالضيق والظلم بين الممثلين، وقالت ديمة: “ما بالضرورة يكون صاير معي هذا الشيء، بس انا هاد الشيء شايفته من غيري، والصراحة الذي استفزني اكثر هو كلام باميلا الكيك، لأنه انا حسيت باميلا بمطرح من المطارح معها حق، حقها كممثلة تطالب بحقها أن تشتغل مع مخرجين معينين، مع شركات معينة، بالتالي هي مهمشة، طب ليه؟“
وانتقدت ديمة رد أحد المخرجين عندما سألته عن سبب عدم وجود أي تعاون بينهما على الرغم من وجودهما في نفس المجال لأكثر من 22 عاماً والذي أجاب بأن الظروف لم تكن مواتية، كما انتقدت عدم المساواة في الترشح للأدوار وحصرها في عدد قليل من النجوم.
وأضافت: ” لمتى رح يكون في ترشيح الاسماء بدل class A في class 10؟ لمتى بده يكون نجم الصف الاول بيأخذ كل الاجر العالي وكل النجوم بيأخدوا فتات هذا العمل؟ لمتى المنتج بدو يتحكم بالكاتب وبالمخرج؟ بالكاتب لما بيقول له أعملي مسلسل كذا لأنه السوق هيك بده، ونفس الشي المخرج، لما بيجي المنتج لعنده ويقول له انا بدي فلان على هذا الدور فيقول له لاء فلان اجره كذا فبدل فلان جبلي فلان.”
كما أوضحت ديمة أن الأجور المطروحة لا تليق بما تعلن عنه شركات الإنتاج، “يا الدور بلا طعمة، وبيبعتولي ياه وبقللون طب ليش باعتينلي، كنتوا جيبوا اي حدا، جيبوا كومبارس بيشتغله للدور، او مثلاً بيحطوا سعر مخزي يعني، تقريباً لا يتجاوز ٨٪ من اجري ، كيف تتجرأ شركة انتاج تجي تعمل عمل بيكتبوا عليه بالبوند العريض: الانتاج الاضخم لهذا العام، وبيجوا بعدين بيدفعولك ملاليم، كيف؟ وين الانتاج الاضخم؟“
ووجهت ديمة رسالة إلى شركات الإنتاج التي تسيطر على الإنتاجات الدرامية وتتمسك بالثنائيات التي أصبحت مكررة ومملة برأيها: “حالياً بالدراما السورية والعربية بشكل عام، دائماً في عنصر ناقص، يا بيكون بالنص، يا بيكون بالإخراج او من الكاستينغ او بيكون حتى بأشياء بسيطة علماً انه نحن انتاجياً قادرين على انه نعمل مسلسلات تنافس الى حد ما الاعمال التي عم تطلع، خلينا ما بدنا نقول عالمياً، خلينا نقول على نتفلكس التي كل العالم عم تشوفها هي الثنائيات ولا الثلاثيات ولا هي الشلل المعمولة، لمتى راح تضللوا حابينها؟ او لمتى بدكن تضللوا مسيطرين؟ خلص تخنتوها يا جماعة يعني حاجة.
