«نجوم الفن» يدعمون رامي جمال بعد أزمته مع المرض ونيته الاعتزال

القاهرة – هاشتاقات الكويت :

حالة من الدعم شهدها الوسط الفني لمساندة الفنان رامي جمال بعد إعلان إصابته بمرض البهاق، وظهور بقع بيضاء اللون بمناطق جسده، ودخوله في حالة من الحزن الشديد بسبب صعوبة ظهوره أمام الجمهور في حالة وجود حفلات أو تصوير فى أحد البرامج التلفزيونية، ليلقى تفاعلًا كبيرًا من قبل الفنانين، الذين أكّدوا ضرورة ابتعاده عن فكرة اعتزال الغناء ولسان حالهم “بنحبك زي ما أنت”.

بينما استنكر الفنان محمد نور، ما ذكره “جمال” بشأن تفكيره في الاعتزال قائلًا: “إيه اللي أنت بتقولهً ده دي حاجة عادية زي أي حاجه، أنت جميل، وكل الناس بتحبك، فنان كبير، وأنا من أول جمهورك وأول واحد قلتلك لازم تغني”.

كما ساندت الفنانة إيمان العاصي “جمال” قائلة، “حبيبي يا رامي، أنت أقوة من أي حاجة، وفنان وموهوب ونجم، وكل ده ولا حاجة قصاد نجاحك وحبك لفنك ربنا يقدرك على الناس عديمة الإحساس، ربنا يخليلك ناريمان بالدنيا”.

وانضمت الفنانة اللبنانية إليسا، لحملة دعم المطرب رامي جمال بعد إعلان إصابته بمرض البهاق، مطالبة إياه بعدم اعتزال الفن بقولها “ممنوع تغيب وممنوع يكون البهاق عذر لغيابك.. إنت بتقول ابتليت بالبهاق، بس مش سبب لتخاف وتغيب،في ناس ابتلت بالكذب والخيانة والسرقة وما هزت، وجودك أساسي ومتل ما إنت بتقول، أصل الحكاية مش حكاية شكل.. حكاية روح”.

بينما قال الشاعر تامر حسين ” يا روما يا حبيبي يا صديقي المُحترم، ربنا يعافيك ويشفيك الناس، حبيت فنك وألحانك شخصيتك سيرتك الباقي كله والله شكليات وربنا يفرحك ويطمنك وكل أخواتك وحبايبك في ضهرك دايماً”.

حمدي الميرغني يدعم رامي جمال: كل ما تشوفني احمد ربنا

بينما دعت الفنانة إيمي سالم “جمال” لاستكمال فنه وإبداعه بقولها: “كمل، لازم تغني واعمل اللي بتحبه، واحنا معاك وفي ظهرك”.

فيما تمنى الفنان حمدي المرغني لـ جمال الشفاء، داعيًا له بالشفاء: “ربنا يشفيك يا رامي، ده مش حاجه أصلاً، ده الصداع أصعب منه يا خويا، الناس كلها بتحبك، وكل ما تشوفني احمد ربنا، واعرف إنك في نعمة “.

بينما دعت المطربة عليا عساف لـ”جمال” بالشفاء بقولها: “ربنا شفيك ويعافيك”.

تامر حسني يؤازر رامي جمال: مايكل چاكسون جاله نفس مرضك وبقى أسطورة

فيما بعث الفنان تامر حسني برسالة دعم إلى الفنان رامي جمال، قال فيها: “إلى الفنان الكبير والصديق الحقيقي والمحترم رامي جمال.. يا حبيبي أنت فنان كبير ومحبوب وليك قيمتك وكل الناس بتحبك ومفيش حاجة هتعطلك عن نجاحك، وتعبك دا لاهو مؤذي ولا مُعدي وكل الناس جواها تعب في منه اللي ظاهر وفي منه اللي مش ظاهر، حتى لو كان تعب نفسي أو مادي”.

وتابع “حسني”: “كل شخص جواه وجع من حاجة معينة، المهم إننا نبص ونتعلم من اللي ظروفهم أصعب مننا ورغم كدا عندهم صبر وبينجحوا في الاختبار وبيقولوا الحمدلله ومكملين وعندهم إرادة وبينجحوا أكتر من الأول”.

وأضاف: “لازم تكمل نجاح يا رامي وشيل أي هلاوس من دماغك واوعى تخبي نفسك.. اللي بيحبك بيحبك لشخصك وفنك صدقني دي حاجة عادية يا رامي والله ملهاش أي تأثير لا عليك ولا على جمهورك بالعكس بقى أنت أكيد شايف الناس كلها طيبين إزاي، ونفسهم يفرحوك وبعدين افتكر إن مايكل چاكسون جاله نفس اللي جالك وبقى أسطورة مبتتكررش خالص وأنت فنان وعارف”.

واختتم تامر حسني رسالة دعمه قائلًا: “أنا واثق إنك مؤمن وبتحمد ربنا وهتقوم وهتكمل وهفكرك قدام كل الناس اللي شايفة كلامي إنك هتنجح أكتر وأكتر وربنا هيكرمك أجمل كرم وهتشوف قريب بحبك يا رامي”.

شذى عن إصابة رامي جمال بالبهاق: اللي يخاف يسلم عليك ميلزمكش

علقت الفنان شذى على إعلان الفنان رامي جمال إصابته بمرض البهاق، بقولها: “أولًا أنت فنان وفنان مهم وأنت قوي ومن معرفتي بيك أنت إنسان قوي اللي يخاف يسلم ميلزمكش، وأنت لامس قلوب ناس كتير بألحانك وبأغانيك، المرض ده ابتلاء من عند ربنا، وأنت قده فكك من الناس اللي مبتقدرش، دول مش مهمين لأن اللي بيقدروا أكتر بكتير”.

وأضافت شذى: “ربنا يكرمك وينجحك أكتر ويخليك لكل الناس اللي بتحبك وأهلك ومراتك، في الناس اللي ملهمش لازمة كلنا عندنا ابتلاءات، بس الناس بتشوف اللي عايزة تشوفوا ومن تجربتي أنا الشخصية في كمية ابتلاء أنا نفسي عشتها تكسر ضهر جمل بقولكً كمل وكلنا في ضهرك إحنا بنقوي بالناس اللي بتحبنا وبتدعمنا والحمد لله على المحن اللي بتعرفنا حبايبنا من أعدائنا.. ربنا يكتبلك الشفا من عندوا هو قادر على كل شيء”.

زينة تدعم رامي جمال بعد إصابته بالبهاق: قلبي معاك وأوعي تفكر تتهزم

علقت الفنانة زينة على إعلان الفنان رامي جمال إصابته بمرض البهاق، ونشرت الفنانة زينة صورة لمنشور رامي جمال عبر حسابها الشخصي على إنستجرام.

وكتبت زينة: “إنسان محترم ربنا يعفو عنك.. للأسف إحنا في دنيا مبترحمش والنَّاس بقت صعبة فيا ريت نحاول يكون في قلوبنا رحمة، أنت إنسان موهوب يمكن أنا متشرفتش بمعرفتك بس قلبي معاك وأوعى تفكر تتهزم ده مرض عادي وربنا يعفوا عنك وقول الحمد لله والنَّاس الرحيمة كتير واعتبرني من أهلك والإنسان بموهبته واحترامه وأخلاقه وبس”.

كما ساند المطرب أحمد زعيم عبر حسابه الشخصي على موقع التواصل الاجتماعي تويتر، رامي جمال، قائلًا: “يا رامي كلنا بنحبك وبنحب فنك.. كمل وكلنا في ضهرك والناس كلها بتحبك وأنت شفت ولمست ده بنفسك.. أنت فنان ونجم وجودك إضافة كبيرة أوي.. ومستنين ألبومك وإن شاء الله هتكسر الدنيا كالعادة”.

المصدر – الوطن